Betanzos presenta actividades de turismo para o verán que inclúe rutas fluviais e visitas guiadas ao centro histórico

457
A alcaldesa María Barral Varela e o concelleiro de turismo Pablo Beade presentaron o programa de actividades

Por primeira vez farase unha visita teatralizada durante dous días de xullo reencarnando a Isabel de Lucerna, unha peregrina suíza que morreu en Betanzos cando facía o Camiño en 1739.

O Concello presentou diversas actividades que a Concellaría de Turismo levará a cabo durante os próximos meses, centradas en rutas e visitas guiadas que terán como protagonistas o centro histórico e o río Mandeo.

O programa iniciarase no mes de xuño coas rutas guiadas fluviais a través da embarcación municipal Diana Cazadora. Trátase dunha actividade aberta a todas as idades para a que será necesario inscribirse previamente na Oficina Municipal de Turismo. Mantéñense os prezos do pasado ano. Será gratuíta para menores de catro anos; un euro para os nenos/as de catro a doce anos; e de cinco euros a partir de 13 anos de idade. O pagamento deberá realizarse en efectivo.

A primeira viaxe será o 18 deste mes ás 17:30 horas. Continuarán os días 25 e 27 deste mesmo mes tamén ás 17:30 horas. Para xullo, están previsto viaxes todos os martes e xoves, excepto o día 11. Será tamén en horario de tarde a maior parte deles menos as xornadas do día 9 e día 23 que será pola mañá, ás 11:30 horas.

Para agosto, haberá actividade os días 1, pola tarde; os días 6 e 8 pola mañá; o 13 pola tarde e o 29 pola mañá. Durante este mes reduciranse as viaxes ao coincidir coa celebración das festas patronais. Para setembro as rutas celebraranse os días 3 e 5 ás 11:00 h e os días 10 e 12 ás 17:00 h.

Ao longo do percorrido, dunha hora e media, os participantes coñecerán aspectos da fauna e flora, a historia da cidade vinculada ao río; o cultivo do viño e distintos aspectos da Reserva da Biosfera, ata o campo dos Caneiros. A embarcación dará a volta cara a Betanzos, sen parar no campo, xa que non está incluída a visita a este. A capacidade máxima da viaxe é de 55 persoas. Para realizalo precísase un número mínimo de 15 persoas.

Outra das actividades presentadas hoxe pola Concellaría de Turismo é o programa de visitas guiadas ao centro histórico dentro da ruta “Betanzos monumental”. Desenvolverase os días 5, 19 e 26 de xullo; 2, 9, 23 e 30 de agosto e 6 de setembro a partir das 11:00 horas. A inscrición deberá realizarse na Oficina de Turismo, desde onde tamén partirá a actividade.

O obxectivo desta ruta, unha das máis demandadas, é dar a coñecer o patrimonio histórico artístico, o centro histórico declarado conxunto histórico artístico en 1970 que conta con monumentos de interese nacional como a igrexa de Santa María de Azougue e a igrexa de San Francisco. A través dun percorrido polo recinto medieval da cidade (a única de Galicia que conserva o tres portas medievais) a ruta dá a coñecer episodios da cidade, feitos curiosos e principais monumentos como a praza dos irmáns García Naveira (Estatua dúas Irmáns García Naveira, Igrexa de San Domingos, Edificio Arquivo, Antigo Hospital de Santo Antonio, Fonte de Diana Cazadora e Soportais); Palco da Música; porta da Vila; praza da Constitución (Casa Núñez, Pazo de Bendaña, Concello, Pazo e Torre de Lanzós); igrexa de Santiago e rúa dos Ferreiros (Pazo de Taboada e Porta da Ponte Nova); Igrexa de Santa María de Azougue; Igrexa de San Francisco (Sepulcro de Fernán Pérez de Andrade “O Boo”), Porta do Cristo, rúa da Cerca, Porta da Ponte Vella; convento das Agostiñas; e as casas populares da Fonte de Unta.

Outra das novidades das actividades presentadas esta mañá é a de “A peregrinatio de Isabel de Lucerna”, unha visita teatralizada os días 6 e 7 de xullo ás 11:00 horas na que se porá en valor o Camiño Inglés por medio desta peregrina que faleceu en Betanzos en 1739 antes de chegar a Compostela.

A súa historia exemplifica as vicisitudes e sufrimentos dos antigos peregrinos a Santiago. Está representada na escultura Porta Itineris Sancti Iacobi, que recibe á entrada de Santiago de Compostela, no barrio de San Lázaro, aos peregrinos que chegan á capital galega polo Camiño Francés.

Tanto ela como o seu marido faleceron como consecuencia da peregrinación a Santiago o 4 de febreiro de 1739 e o 26 de novembro de 1738 respectivamente. Así consta en senllas anotacións do libro de rexistro de defuncións do antigo hospital de Santo Antonio de Padua de Betanzos, no Camiño Inglés. A nota sinala que “dio sepultura en el zementerio de este Hospital […] al cadáver de María Ysabel de nación germana y oriunda de Lucerna, peregrina y viuda que quedó de Cristobal Müller […] Recivió el sacramento de la extremaunción, que los demás no se le pudieron administrar” . Pouco despois da súa morte, extraéronlle do ventre un neno que viviu hora e media. É unha mostra dos sufrimentos de miles e miles de peregrinos anónimos.

Medievo para os nenos/as

Por último, Turismo tamén organizará, un ano máis, como previo ao comezo da programación da Feira Medieval, o programa “O Medievo para os nenos”, unha actividade para nenos de 4 a 12 anos que fará que poidan participar da feira dunha maneira especial, cun percorrido polas rúas do centro histórico. A actividade celebrarase o día 10 de xullo ás 11:00 horas. Os/as interesados/as poden dirixirse á Oficina de Turismo para inscribirse. Hai un límite de 35 prazas.