A alcaldesa de Betanzos, María Barral, mantivo unha reunión na subdelegación do goberno coa subdelegada, Pilar Rioboó; o xefe da Demarcación de Estradas do Estado en Galicia, Ángel González do Río; e xefe do Área de Conservación e Explotación da Demarcación de Estradas, Eduardo Toba; para analizar diversas actuacións que en materia de infraestruturas levarán a cabo no Concello durante os próximos meses e outras propostas expostas desde o goberno local para mellorar a seguridade en varios puntos da rede de estradas do Estado en Betanzos.
Entre as formulacións propostas pola alcaldesa pediuse a cesión da antiga N-VI ao Concello co fin de que se poidan levar a cabo diversas actuacións para humanizar a vía que agora, por normativa do Estado, non se poden executar. A primeira edil entende que a estrada se converteu nunha “travesía urbana” e, por tanto, a competencia “debe pasar a ser municipal unha vez que Fomento acometa unha serie de obras que lle deixen en bo estado de conservación”. Unha formulación que coincide cos dos responsables de Estradas e no que agora incidirá o Concello que trasladará unha petición oficial. A cesión incluirá desde o inicio do municipio no seu límite con Coirós, o centro da cidade e o Valdoncel, ademais da rúa da Ribeira, pertencente á N-651.
Precisamente para a zona do Valdoncel e con anterioridade a que se produza esa cesión por Fomento, o Concello pretende que se mellore a seguridade nos pasos de peóns, utilizados, especialmente, por numerosos estudantes que se dirixen aos institutos. Outra das solicitudes realizadas pola alcaldesa foi, precisamente, para a avenida da Coruña, para que se execute, canto antes, unha glorieta no cruzamento da Magdalena, para a que xa se redactou un estudo técnico; e outra para o cruzamento da ponte Nova. O obxectivo é mellorar a seguridade nestes dous puntos e unha maior fluidez de tráfico.
Canto ás obras a curto prazo, Fomento presentoulle á alcaldesa o avance do proxecto que será executado en Queirís (Coirós) e que afecta ao termo municipal de Betanzos, onde se construirá unha glorieta e acondicionarase a estrada N-VI, mellorando a seguridade a través dun investimento que alcanzará os 600 000 euros.
