Hoxe comezaría a Feira Franca Medieval 2020. Sería a edición XXIII, suspendida polo Covid-19. O concello anunciou a decisión hai agora dous meses por “responsabilidade e porque, por encima de todo, está a saúde”. A non celebración da feira, coincidiu esta semana, co anuncio do Concello de suspender as festas de agosto, con especial incidencia, no Globo e nas xiras a Os Caneiros e evitar tamén con iso eventos de aglomeración de xente.
“Do mesmo xeito que o Globo ou Os Caneiros, suspender a Feira Medieval foi unha decisión dura porque é un dos eventos máis importantes de cantos se celebran ao longo do ano en Betanzos e de maior impacto para a economía local, pero “seguimos mantendo que é necesario velar pola saúde e que esta debe prevalecer sobre calquera outra circunstancia”. A iso sumouse neste caso todo o aspecto organizativo. A Feira require un longo proceso nese aspecto coa apertura de prazos de inscrición dos artesáns, que veñen de toda España; e dun intenso traballo de validación e de selección de solicitudes. Todos estes trámites xa se terían que iniciar hai meses e non se fixeron como consecuencia do Covid-19. Só o ano recibíronse 380 peticións para cubrir un centenar de postos”, lembra a alcaldesa, María Barral.
Pero Betanzos non quere pasar por alto a feira “porque despois de 23 anos é algo moi noso. Declarada de interese turístico galego, a feira converteuse ao longo destes anos nun referente na nosa comunidade”, indica a alcaldesa. “Durante os últimos anos recibimos a visita de representantes doutros concellos non só de Galicia senón doutras rexións de España interesados na nosa Feira e o seu desenvolvemento. En ocasións, a cotidianidad dun evento, de algo que celebras todos os anos e que se prolonga no tempo, fai que quizá non lle deamos a verdadeira importancia ou singularidade que ten. Fai que nos deteñamos en detalles pero que non vexamos a feira medieval como o gran evento que é a nivel xeral e a repercusión que ten. Esa perspectiva dánola o feito do interese que causa ano tras ano entre os propios vendedores e entre os miles e miles de visitantes que ten. Por iso, temos que seguir mantendo e potenciando, de fronte ao futuro, algo que para nós é único”.
E de aí, apuntou María Barral, “que este ano tampouco nos queiramos esquecer da Feira Medieval e quixemos renderlle un pequeno tributo, un pequeno e humilde homenaxe á Feira e a cantas persoas participan ano tras ano nela. Aos voluntarios, ao persoal municipal e todos os seus visitantes. Para lembrala no centro de Betanzos, no atrio de Santo Domingo cunha exposición de fotografías nas que quixemos representar algúns dos momentos máis significativos do programa: a expulsión dos leprosos, a entrada do Conde, o torneo medieval, a carreira de bocois, as danzas, o Aquelarre…. Unha exposición que se pode ver desde xa e por espazo dun mes”.
