A exposición Orgullo da nosa lingua: o galego é un tesouro para compartir estará entre o 27 de maio e o 2 de xuño na praza dos Irmáns García Naveira

46

A exposición Orgullo da nosa lingua: o galego é un tesouro para compartir da Secretaría Xeral de Política Lingüística chegará a Betanzos o vindeiro luns 27 de maio e poderá visitarse na praza dos Irmáns García Naveira ata o vindeiro 2 de xuño. Esta exposición chega a Betanzos a través da Rede de dinamización lingüística da Xunta de Galicia, da que o Concello de Betanzos forma parte.

A exposición aborda temas como a riqueza toponímica de Galicia, a abundancia do noso refraneiro, as variedades dialectais, as numerosas palabras que temos para falar da chuvia ou as moitas formas diferentes de chamarlles aos mesmos peixes. A través dun código QR, os e as viandantes tamén poderán interactuar desde os seus móbiles e participar no sorteo de distintos premios (entradas, lotes de libros, cadernos…).

A mostra consta de nove paneis que percorren particularidades do galego co fin de mostrar o seu valor e a súa riqueza, alimentar o sentimento de pertenza e convidar a cidadanía a falalo e poderá visitarse por libre ou ben coa guía dunha persoa dinamizadora que atenderá as persoas asistentes en Betanzos no seguinte horario:

Martes 28 de maio de 10:00 h a 14:30 h e de 16:00 h a 20:00 h

Mércores 29 de maio de 10:00 h a 14:30 h e de 16:00 h a 20:00 h

Xoves 30 de maio de 10:00 h a 14:30 h e de 16:00 h a 20:00 h

Venres 31 de maio de 10:00 h a 14:30 h

A Secretaría Xeral de Política Lingüística programa esta exposición en colaboración co Servizo de Normalización Lingüística do Concello de Betanzos a través da súa Rede de dinamización lingüística. O Servizo de Normalización Lingüística do Concello de Betanzos está subvencionado pola Deputación provincial da Coruña e pola Consellería de Cultura, Educación, Formación Profesional e Universidades da Xunta de Galicia.