O Concello de Betanzos quere expresar a súa máis sincera felicitación aos deportistas betanceiros Antón Lagares e Javier Cid, do Club Ría de Betanzos, pola extraordinaria actuación protagonizada no Campionato do Mundo Júnior de Canoa, disputado en Canadá.
Os dous padexeiros acadaron a medalla de prata na proba de C4 500 metros, un resultado que os sitúa entre os mellores do mundo na súa categoría e que supón un novo éxito para o deporte betanceiro.
Ademais, Antón Lagares completou unha destacada participación coa consecución da medalla de bronce na proba de C1 200 metros, sumando un segundo metal mundial ao seu excelente campionato.
Estes logros son o reflexo do esforzo, da dedicación e do traballo constante dos deportistas, así como do importante labor que desenvolve o Club Ría de Betanzos na formación de novos talentos e na promoción do piragüismo.
Desde o Concello de Betanzos queremos trasladar os nosos parabéns a Antón Lagares, Javier Cid, ás súas familias, ao equipo técnico e ao Club Ría de Betanzos por estes magníficos resultados, que enchen de orgullo a toda a cidade e contribúen a seguir situando o nome de Betanzos no máis alto do deporte internacional.
