“A Xunta comprometeuse co Concello a participar no financiamento dos traballos de recuperación da parte histórica do parque do Pasatempo”. O alcalde de Betanzos, Ramón García Vázquez, anunciou o acordo despois de manter unha reunión co conselleiro de Educación e Cultura, Román Rodríguez. O primeiro edil mostrou a súa “satisfacción polo apoio da Consellería de Cultura e por extensión da Xunta ao proxecto exposto polo Concello, que se suma ao recibido anteriormente polo goberno da Deputación da Coruña, e o interese posto tanto polo presidente Núñez Feijóo e o conselleiro, consciente da importancia que ten o parque e o significado da actuación”.
O alcalde indicou que o compromiso do conselleiro reflectirase en que a Xunta financiará aquelas actuacións que, por límite orzamentario, non poidan incluírse na primeira fase do proxecto, isto é, nos 750.000 euros que achegarán Deputación e Concello. “O resto de traballos ata a recuperación integral do parque serán avaliados de forma conxunta entre Concello e Xunta para a procura de liñas de financiamento, abríndose a porta, unha vez declarado BIC, aos fondos vinculados co 1,5% Cultural.
O obxectivo que nos marcamos con este acordo é que leve a cabo a recuperación da totalidade do parque”.
Para o primeiro edil o compromiso da Consellería “pecha un primeiro proceso, quizá o máis importante, o do financiamento e agora o que nos queda é traballar e acelerar todos os pasos administrativos para poñer todo en marcha canto antes”. Atrás, lembrou o alcalde, “quedan meses de traballo, de xestións, de reunións, de tocar portas para que isto fose unha realidade e dispoñer da partida económica suficiente para garantir a recuperación total do parque.
A sensibilidade mostrada por todas as partes implicadas: os responsables de Patrimonio Cultural, o conselleiro, o presidente da Xunta e antes polo presidente da Deputación da Coruña, fan que agora podamos anunciar un proxecto que, sen dúbida, vai poñer o parque do Pasatempo á altura do que se merece”.
García Vázquez indicou que outro dos acordos establecidos coa Xunta pasa porque desde Patrimonio, paralelamente aos traballos de incoación do parque como Ben de interese Cultural, elabórese o documento que contemple os traballos de recuperación e base da licitación dos traballos. “Con isto garantímonos acurtar os prazos e que as obras se axusten ao máximo aos requisitos que require o BIC e que mellor que sexa Patrimonio o que, en colaboración cos técnicos municipais, estea, digamos, á fronte deste proceso”.
