Estudar unha solución intermedia entre a proposta de Adif e a formulación do Concello para a eliminación do paso a nivel do porto. Iso é o que acordaron onte en Madrid, a alcaldesa, María Barral, e responsables técnicos de Adif nunha reunión mantida na sede da entidade pública despois de que o Concello se opoña á formulación de construción dun viario que conecte o Paseo Ramón Beade e a rúa Arxentina a través dun paso superior sobre a vía do ferrocarril, cunha pasarela peonil que se situará na contorna do actual paso a nivel e a repavimentación da rúa Arxentina ata o paseo Ramón Beade.
A primeira edil trasladou na reunión mantida en Madrid que o Concello se opón a esta formulación polo impacto que supón e volveu insistir na construción dunha conexión a uns 300 metros aproximadamente do cruzamento das avenidas da Coruña e Fraga Iribarne en dirección Betanzos-Sada e desde aí un viaduto duns 163 metros de lonxitude para conectar cos terreos portuarios.
Esta solución é actualmente inasumible por parte de Adif polos altos custos económicos que suporía, máis de seis millóns de euros segundo as súas estimacións, co que se acordou buscar tecnicamente unha solución intermedia, sen o impacto visual da proposta de Adif e recollendo unha conexión desde a antiga N-VI como expón o Concello pero cun viaduto máis curto. Agora, realizaranse as xestións ante Estradas para tratar de obter as autorizacións correspondentes e poder trazar un novo proxecto.
A primeira edil lamentou que esta circunstancia “atrase un proxecto que é importante para Betanzos desde o punto de vista de seguridade e desde o punto de vista de servizos a numerosas empresas e actividades que están na zona portuaria”. No entanto, é consciente de que “se trata dun proxecto, polo que aposta o Concello, que supón un investimento de entre seis e sete millóns de euros, na situación actual, cinco millóns máis que o exposto por Adif. Isto fai que podamos entender a postura do ente e por iso abrímonos a estudar unha alternativa intermedia”, sentenciou.
A primeira edil agarda que a proposta poida estar “exposta en pouco tempo por parte de Adif e que non se demore moito máis”.
Cómpre lembrar que Adif presentara en febreiro de 2021 cinco alternativas para a supresión do paso a nivel despois de que en novembro de 2018 presentase unha primeira que, polo seu impacto, foi descartada polo Concello. Entre as cinco alternativas presentadas en febreiro do pasado ano incluíase unha que reunía as condicións que o Concello defendeu desde hai anos: a conexión do porto coa antiga N-VI. Así llo trasladou a alcaldesa nunha carta á dirección de Adif, acompañada por un estudo técnico. Nese escrito, e tendo en conta tanto as valoracións técnicas como as pretensións da veciñanza e do propio goberno local, a primeira edil expresaba a Adif que a elección do Concello pasaba pola que eles denominaban “alternativa 4” que incluía a construción dunha glorieta na avenida da Coruña, no PK 583+875, é dicir, a uns 300 metros aproximadamente do cruzamento das avenidas da Coruña e Fraga Iribarne en dirección Betanzos-Sada. Un viario nunha zona despexada e máis afastada de vivendas e do núcleo urbano.
