O Concello iniciará este mes os traballos de renovación e levará a cabo un importante investimento na mellora da eficiencia enerxética do Museo das Mariñas-Vicente de la Fuente, unha actuación que porá en valor tamén as coleccións que alberga esta instalación municipal que este ano cumprirá o seu 40 aniversario.
Trátase de dous proxectos que foron contratados polo Concello cun investimento total duns 376 000 euros e que inclúen a substitución de todo o sistema de rede de iluminación e de toda a carpintaría do edificio, as xanelas, dentro dos programas de aforro enerxético nos que está a participar Betanzos a través dos fondos europeos.
O primeiro deles, o de iluminación, ten un custo duns 204 000 euros e persegue tres obxectivos: a redución do consumo enerxético da instalación; a adecuación das instalacións para garantir o funcionamento óptimo de luminarias e, en terceiro lugar, a mellora do confort visual do visitante e a minimización dos danos ás pezas expostas.
A alcaldesa, María Barral, indicou que o proxecto era unha actuación “pendente desde hai anos e importante para un Museo referente na provincia”. Os traballos centraranse na substitución da iluminación actual, que é difusa con paneis fluorescentes, luminarias halóxenas e proxectores que son enerxeticamente ineficientes e que nalgúns casos provocaron unha deterioración dalgunhas obras danando as súas cores orixinais.
A actuación céntrase na substitución da iluminación interior da edificación, que data do ano 1983, tendo en conta a súa ineficiencia e mal estado actual.
Esta substitución realizarase por unhas novas luminarias LED e proxectores de aluminio fundido e material termoplástico. Os reflectores e refractores disporán do sistema OptiBeam de elevada eficiencia luminosa e distribución homoxénea podendo orientarse até 90º en plano horizontal e 360.º arredor do eixe. Para a zona de oficinas, a biblioteca e as aulas, as pantallas actuais de fluorescentes serán substituídas por unhas novas pantallas máis eficientes. Tamén se substituirá a iluminación das vitrinas por unhas novas tiras de led que permitan melloras na conservación ao non incrementar a temperatura do interior da vitrina.
Canto á carpintaría exterior do edificio, o proxecto, agora en fase de contratación, prevé un investimento de 172 000 euros coa substitución da carpintaría exterior da edificación, tendo en conta o seu mal estado actual. A totalidade das xanelas e portas están en mal estado, con perda de material, caruncho en moitos casos e deformación excesiva en case todas, que dificultan a súa estabilidade e as normais manobras de apertura e peche, algunhas totalmente condenadas, facéndoas inútiles para o fin para o que serven.
