Os servizos técnicos municipais supervisarán os restos da fachada da vivenda que se derrubou na madrugada do pasado sábado na rúa Santiago, no centro histórico. Tratábase dunha fachada sobre a que recaía unha orde de execución de 2022 que o propietario non executou.
Os restos caídos sobre a vía causaron danos en vehículos polas salpicaduras das pedras. A rúa permanece cortada ao tráfico e ao longo do día retiraranse os restos de pedras, ben por parte do propietario do inmoble ou, na súa falta, polo Concello de forma subsidiaria.
O persoal técnico supervisará a situación do inmoble para determinar as posibles actuacións que teña que levar a cabo o propietario.
O Concello explicou que con base ao informe dos servizos municipais tomará as medidas que correspondan, mesmo a nivel xurídico, por unha situación que “non é admisible” e da que tanto neste como noutros moitos casos os propietarios dos inmobles son“conscientes e non fan o que lle corresponde como se especifica as ordes de execución”.
Sancións
Urbanismo indicou que desde hai semanas o persoal técnico municipal está a realizar unha inspección das vivendas do centro histórico que se atopan en malas condicións, reactivando expedientes administrativos con sancións coercitivas en varias propiedades situadas en rúa da Mariña, a Rúa Nova ou Travesa co fin de que se tomen medidas por parte dos “donos ante o risco no que se atopan pola deterioración constante dos inmobles”.