Betanzos celebrou o tradicional concerto da ilusión. Trátase dunha das citas culturais máis importantes do ano no que a Banda municipal recibe a novos integrantes. A alcaldesa, María Barral, explicou que o concerto é “unha das citas máis agardadas polos nosos mozos e mozas, que está na axenda de todas as persoas que seguen a actividade cultural da cidade e volve pór en foco a Banda Municipal de Música de Betanzos. O Concerto da Ilusión citounos, un ano máis, para compartir un soño, o dos debutantes que, sobre o mesmo escenario que os músicos e as músicas veteranas, experimentarán as emocións propias dunha estrea e converten Santa María nesa fábrica de soños que anuncia o Nadal”.
A alcaldesa destacou a importancia que ten este acto para os mozos e as mozas integrantes, o “bautismo” como músicos e músicas. Trátase de Libe Cabanas Somoza, Jumena González Herraiz, Martín Silva Pérez, Nicolás Varela Suárez, María Boado Vidal e Brais Pereira Brey.
