O Club BTT Caimanes Betanzos puxo o peche á tempada autonómica de ciclocross o pasado 28 de decembro, data na que se disputou o Campionato de Galicia de CX, proba que serviu para dar por finalizado o calendario galego desta disciplina.
O balance da tempada é moi positivo para a entidade betanceira, que estivo presente en todas as probas da Copa de Galicia, cunha media de dez corredores por carreira, amosando un firme compromiso co ciclocross e unha participación constante ao longo de todo o campionato.
Entre os resultados máis salientables, cómpre destacar o excelente momento de forma de Xiana Seijo, que no seu primeiro ano como júnior conseguiu proclamarse gañadora da Copa de Galicia. Ademais, no Campionato de Galicia asinou unha actuación sobresaliente, acadando o subcampionato autonómico nunha carreira moi disputada, que mantivo a emoción ata os últimos metros.
A nivel estatal, varios corredores do Club BTT Caimanes Betanzos tomaron parte en diferentes probas da Copa de España de Ciclocross, nas que Xiana Seijo logrou situarse entre as dez primeiras clasificadas nalgunha das citas, confirmando a súa progresión e competitividade fronte ás mellores corredoras do panorama nacional.
Para pechar a tempada de ciclocross a nivel estatal, os corredores do club desprazaranse proximamente ata Tarancón para disputar o Campionato de España de Ciclocross, unha das citas máis importantes do calendario.
Desde o Club BTT Caimanes Betanzos quérese salientar, ademais dos resultados deportivos, o respecto, a deportividade e o compañeirismo demostrados por todos os corredores ao longo da tempada, defendendo con orgullo e exemplaridade as cores de Caimanes en cada competición.
^*Todas as fotos son de Pirucho Pequeno
Todas as fotos son de Pirucho Pequeno
