O Concello retomou a actividade das feiras mensuais mantendo o dispositivo de seguridade e as medidas de seguridade decretadas pola Covid 19. É dicir, reorganización dos postos na propia Praza García Irmáns para incrementar a distancia de seguridade, ademais de aplicar as normativas agora vixentes do uso de máscara obrigatoria e desinfección con hidrogeles.
Tras a reunión mantida hai unhas semanas cos vendedores, a Concellería de Feiras remitiu un escrito aos responsables de cada posto explicándolles as medidas adoptadas e un mapa coa localización do posto, de forma que “cada un saiba onde ten que instalarse cando chegue á praza”.
Se a pesar de todo iso, algúns vendedores non quixeron instalar os postos ou non desexaron estar na feira “porque se lles move uns metros da localización que tiñan antes, pois o lamentaremos, pero para o Concello, nestes momentos, o prioritario é garantir a seguridade e axustarse aos protocolos establecidos”.
Estableceronse corredores de paso o suficientemente anchos, de máis de seis metros, para manter as medidas de seguridade e tentar establecer unha orde e indicar o sentido da marcha á hora de percorrer os postos. Haberá catro entradas e outras tantas saídas.
Na zona de Valdoncel, na avenida de Castela, na Alameda, e rúa Rollo. Houbo un dispositivo especial de seguridade con Policía Local, Protección Civil, e efectivos de seguridade privada.
Entre os postos tamén houbo un plástico separador e só dous vendedores, como máximo, en cada un deles. Os únicos postos que non estarán na feira serán os de venda de produtos de segunda man.
Para a reordenación da feira, o goberno local ampliou a zona de superficie da feira para non reducir o número de postos. Así, decidiu situar postos na zona da rúa de Castro, na entrada cara ao centro histórico; e na avenida de Castela ata o cruzamento coa rúa Emilio Romay. O resto estará na praza García Irmáns.
A edil de Feiras, Mónica Carneiro, insistiu en que se fixo un seguimento especial aos postos de venda “non permitindo que se instale ningún que non teña todas as autorizacións vixentes”.
