Betanzos, Abegondo, Carral, Coirós e Paderne clausuraron un novo Obradoiro de emprego especializado na promoción turística local e información ao visitante e a instalación e mantemento de xardíns e zonas verdes. Nestas dúas disciplinas participaron desde o pasado mes de setembro 16 alumnos e alumnas e 6 persoas no equipo formativo.
A alcaldesa, María Barral, deulle os parabéns ao alumnado “por completar os obradoiros e aproveitar esta oportunidade, primeiro como formación e logo para axudarvos na procura de emprego e inserción laboral”. A primeira edil valorou o obradoiro como un “esforzo das administracións” e púxoo como “exemplo de coordinación e funcionamento entre elas. Seis administracións: cinco concellos e a Xunta apostando pola formación nunha liña, que xa vos adianto, imos continuar con base aos resultados destes últimos anos e ou grao ou nivel de inserción laboral que obtivemos nos obradoiros que fixemos conxuntamente”.
Indicou que nas dúas especialidades, que completan outros programas anteriores, “son unha aposta clara por actividades moi vinculadas coa comarca, especialmente no ámbito do turismo, no que cada vez estamos máis implicados tanto a nivel particular, como en agrupacións como a da Reserva da Biosfera. Temos moito potencial e necesitamos de xente coma vós, coñecedores, por residir aquí, de toda a riqueza que podemos ofrecer e con formación para facer esa promoción” indicou, á vez que lles desexou sorte “nesta nova andaina” e o desexo que aproveiten “esta oportunidade de emprender unha nova etapa”.
O obradoiro incluíu formación en promoción turística e instalación e o mantemento de xardíns e zonas verdes. Tivo unha duración de seis meses e foi subvencionado dentro dun programa de “emprendemento xuvenil” por parte da Consellería de Economía. Trátase dun programa que ten como obxectivo a adquisición por parte deles alumnos de experiencia profesional mediante a prestación de servizos de utilidade pública ou interese social, dando con iso resposta ás demandas do actual mercado laboral.
Informar o patrimonio cultural e inmoble, deseñar e elaborar plans de promoción e dinamización turística local; información sobre as actividades municipais ou a atención nas oficinas municipais de turismo, promoción de rutas… son algúns dos obxectivos do obradoiro vinculado ao turismo. En zonas verdes, a actuación centrouse no parque do Pasatempo, de interese por parte de todos os concellos implicados.
