Betanzos pechou as festas patronais de San Roque con resultados “moi satisfactorios”, segundo o balance que fixo a alcaldesa, María Barral, “especialmente pola participación que tiveron e a súa repercusión, á marxe, da importancia que teñen para a economía local”.
A primeira edil destacou a importancia das festas “a nivel autonómico” que as converten “claramente nun referente do verán en Galicia”. Aludíó, neste sentido, á repercusión que teñen polo seu “carácter único” e a súa programación de actividades para todas as idades o que fai que “teñamos eses datos de altísima participación tanto dos propios betanceiros e betanceiras como de persoas da comarca e turistas que eses días están na nosa comunidade”.
María Barral mostrou o seu agradecemento aos integrantes da Función Globo de San Roque, que ela preside, polo traballo realizado, especialmente “a todos e cada un dos colaboradores que se esforzaron ao máximo para que o Globo elevásese de novo aos ceos de Betanzos nunha tradición cumpriu o seu 150 aniversario”.
Explicou que esa noite, a do 16, foi a xornada máis especial por todo o que representa para os betanceiros e betanceiras, unha emoción que Betanzos quixo compartir con todo o mundo e cos betanceiros e as betanceiras que están no exterior a través das súas propias redes sociais onde se transmitiu en directo o lanzamento do Globo.
Á marxe do Globo, como era previsible, “as actuacións musicais de Panorama, Olympus, París de Noia, o especial de ABBA ou Disney, e as xiras de Os Caneiros ao que se suman os eventos deportivos, actividades de música, infantís ou tradicionais como a “cucaña” fixeron que as festas volvesen obter cifras récord en canto a participación.
María Barral fixo mención especial tamén ás comitivas de representantes das festas, como parte fundamental da programación; e agradeceu os magníficos pregóns dos betanceiros Óscar Gilsánz e Mario Silva. Destacou que todo transcorreu sen incidencias importantes, a pesar das miles de persoas que participaron todos os días nos festexos.
Indicou que na segunda xira de Os Caneiros producíronse tres evacuacións por parte dos servizos de emerxencia. Unha delas por intoxicación etílica e as outras dúas por un incidente que se produciu na embarcación na que se regresaban á cidade desde Os Caneiros, pasadas as dez da noite. Estas dúas persoas sufriron contusións na cabeza e tiveron que ser trasladadas en ambulancia ao CHUAC.
A primeira edil agradeceu o traballo dos servizos municipais e de traballadores municipais “para que todo saíse ben” e ao tecido empresarial “que colaborou, a través do libro das festas, co Concello co desexo de que o próximo ano sexan moitos máis”. Neste sentido, fixo especial fincapé nos servizos de limpeza que cada noite e boa parte do día “limparon as rúas para que todo estivese en perfecto estado”.
Precisamente, os servizos municipais remataron as tarefas de limpeza do campo de Os Caneiros coa retirada duns 4000 quilos de residuos.
