O Concello de Betanzos colabora cun novo proxecto organizado polos centros de ensino de secundaria IES As Mariñas, IES Francisco Aguiar e CPR Nosa Señora do Carme Atocha. Trátase do concurso de fotografía “Betanzos 1926 – 2026”, que xorde a partir da revisión das fotografías tomadas por Ruth Matilda Anderson na súa visita a Betanzos hai cen anos.
Este concurso está destinado ao alumnado dos centros de ensino de secundaria do Concello, que poderá participar individualmente ou en grupos, nas seguintes categorías:
-
1.º e 2.º da ESO
-
3.º e 4.º da ESO e FPB
-
Bacharelato, ciclos medios e ciclos superiores.
O obxectivo é reproducir na actualidade unha das fotografías realizadas en Betanzos por Ruth Matilda Anderson e acompañar a imaxe dun breve texto explicativo (de entre 50 e 300 palabras), en lingua galega, no que se describan as transformacións experimentadas polo espazo retratado.
As obras deberán presentarse a través do enderezo electrónico [email protected]. Deberá indicarse o nome completo do autor/a, o curso e o centro no que estuda.
Concederase un premio por cada categoría e os traballos gañadores serán expostos no Edificio Liceo do Concello de Betanzos.
Podes consultar as bases aquí.
