Betanzos instala a nova herba artificial de última xeración no campo do Carregal

524

Os traballos, que concluirán nuns días, contan cun investimento duns 149 000 euros

A empresa que renova o campo de fútbol do Carregal iniciou a última fase dos traballos coa colocación da herba artificial de última xeración. Os traballos estarán concluídos nuns días aínda que poden verse afectados polas inclemencias meteorolóxicas. Desta mellora veranse beneficiados os equipos de categoría inferior do Betanzos CF así como equipos de penas e veteranos, tanto en Fútbol 11 como en Fútbol 8. As obras incluíron a retirada do antigo céspede e o acondicionamento da superficie para a colocación esta semana do novo. O custo do novo campo é de 149 803 euros.

O proxecto recolle a substitución do campo de fútbol de céspede artificial, por un sistema de última xeración na súa composición como polímero de poliolefinas. Esta composición  permite a utilización do Campo para a práctica tanto de Fútbol 11 como de Fútbol 8, realizando as marcas minimizadas  en     o terreo  de xogo    para  ambos os  tipos  de xogo    e  dotando  a     as instalacións  do equipamento deportivo necesario, atendendo por tanto ás esixencias dos diferentes equipos locais que o utilizan e demostrando a polivalencia da instalación que se proxecta obtendo un campo de Fútbol de herba de céspede artificial de última xeración, dotado de dous campos de Fútbol 8 transversais ao anterior.

A alcaldesa, María Barral, que visitou o campo de fútbol xunto co concelleiro de Infarestruturas, Diego Fernández, explicou que se trata dunha actuación necesaria “para cubrir as necesidades que ten o Concello en materia deportiva, despois de que o actual campo sufrise a lóxica deterioración polo paso do tempo”. A primeira edil indicou que os traballos forman parte dunha serie de proxectos de mellora de instalacións deportivas que se irán executando de forma paulatina a curto e medio prazo “aínda que gran parte destas xa viñeron executando, especialmente, no relativo ás melloras de pistas polideportivas descubertas, durante os últimos meses”.

A renovación da herba artificial completarase con outro proxecto que obtivo máis apoio no programa de orzamentos participativos. Precisamente a  mellora do campo de fútbol do Carregal coa instalación de peche acristalado na zona superior da bancada, bancos homologados, teito na entrada do campo, reparación e pintado de muros e portóns, ampliación de redes de servizos, formigonado do perímetro do campo e construción de vestiarios femininos recibiu  un total de 105 votos dos 339 emitidos, tanto de forma telemática como presencial, no programa de orzamentos participativos. Estes traballos serán agora definidos nun proxecto para ser incluídos nos orzamentos municipais que o goberno local agarda poder levar a Pleno o próximo mes de xaneiro.