O Club BTT Caimanes Betanzos pechou unha tempada histórica, brillando tanto no ciclocross como nas probas de resistencia. O equipo estivo presente en todas as probas da Copa de Galicia de Ciclocross, consolidando a súa presenza nas categorías infantil, cadete masculina e feminina, júnior, máster 30, máster 40 e máster 50. Ademais, algúns dos seus deportistas competiron en diversas probas da Copa de España, levando o nome de Betanzos ao máis alto do ciclismo estatal.
Éxitos na Copa de Galicia
Entre os fitos máis salientables da tempada, Xiana Seijo, en categoría cadete feminina, e Aquiles Sordo, en máster 30, proclamáronse campións da Copa de Galicia de Ciclocross, un logro que reflicte a súa dedicación e esforzo. A constancia do equipo tamén se viu recompensada no campionato autonómico, onde Raúl Puelles (categoría júnior) e Aquiles Sordo (máster 30) acadaron os títulos de campións de Galicia. Pola súa parte, Xiana Seijo logrou un meritorio terceiro posto en cadete feminina, confirmando o seu prometedor futuro no ciclismo.
Destacada Participación Internacional
O éxito dos corredores de Caimanes Betanzos non pasou desapercibido para as seleccións galega e española. Xiana Seijo e Raúl Puelles foron convocados para representar a Galicia en varias probas da Copa de España, así como no recente Campionato de España, onde Raúl obtivo unha destacada terceira posición na categoría júnior. Ademais, formou parte do equipo de relevos mixto (team relay) da selección galega, conseguindo o subcampionato nacional.
Raúl tamén defendeu as cores da Selección Española no Campionato de Europa de Ciclocross e na Copa do Mundo en Bélxica, Países Baixos e Benidorm. Pola súa banda, Aquiles Sordo, referente en máster 30, asinou unha actuación brillante no Campionato Europeo, onde acadou unha destacada cuarta posición, quedando a escasos segundos do podio nunha das probas máis esixentes da tempada.
Bos Resultados en Resistencia
Ademais do éxito no ciclocross, o club tamén destacou nas probas de 3 horas de resistencia. Aitor Vázquez logrou un excelente segundo posto na Copa Galicia de 3 horas de resistencia en categoría júnior, así como un terceiro posto no campionato de Galicia na mesma disciplina, confirmando o bo nivel do equipo tamén neste formato de competición.
Balance e Futuro
O Club BTT Caimanes Betanzos celebra unha tempada chea de éxitos e aprendizaxe, consolidándose como un referente no ciclocross e na resistencia a nivel galego e nacional. Estes logros son froito do traballo conxunto dos corredores, corpo técnico e familias, cuxo esforzo permitiu alcanzar metas tan altas.
Con vistas á próxima tempada, o club segue apostando polo desenvolvemento de novos talentos e a promoción do ciclismo, coa ilusión de continuar levando o nome de Betanzos ao máis alto do panorama ciclista. ¡Parabéns, Caimanes, e a seguir sumando éxitos!
