O Concello de Betanzos prepárase para acoller unha nova e ambiciosa proposta dirixida ao público máis novo: o Betaverso Festival. A cita terá lugar o vindeiro sábado 6 de xuño no emblemático Parque do Pasatempo, un espazo idóneo para converterse no punto de encontro de referencia para a mocidade, a música e a convivencia.

Dende o Goberno local destacaron que o Betaverso Festival nace co obxectivo prioritario de ampliar as alternativas de lecer xuvenil no municipio, ofrecendo un espazo de encontro seguro, moderno e cun gran ambiente. Ademais, un dos grandes atractivos do evento será a súa entrada totalmente gratuíta, facilitando así o acceso a todas as persoas que desexen gozar da xornada. 

O festival, impulsado directamente a través da Concellería de Xuventude, aposta por formatos actuais capaces de conectar coas novas xeracións no marco dunha paraxe única e de gran valor patrimonial como é o Parque do Pasatempo. 

Nas próximas datas iranse debullando todos os detalles do cartel de artistas convidados, así como o resto de actividades e a programación completa. Desde a organización e o Concello animan a toda a veciñanza e visitantes a permanecer moi atentos ás redes sociais municipais para non perder ningunha novidade sobre esta gran cita