O concelleiro de Infraestruturas, Andrés Hermida, xunto a técnicos municipais, mantivo unha reunión con representantes da asociación de veciños de Infesta para analizar o proxecto de mellora da estrada AC-542, entre a zona de As Cascas e Infesta, presentado hai uns días pola Consellería de Infraestruturas.
Concello e veciños puxeron sobre a mesa diversas observacións que trasladarán á Xunta e nas que, en moitos casos, coinciden veciños e Concello. Trátase, nuns casos, de actuacións que consideran deben ser tidas en conta á hora de executar as obras de mellora e que non foron recollidas no proxecto, e noutros, de “modificacións sobre o que hai exposto, que entendemos, desde o noso punto de vista, que mellorarían tamén as condicións da vía”.
O edil de Infraestruturas explicou que nesas alegacións traballan tanto os técnicos municipais como a Policía Local, e que serán expostas aos veciños nunha reunión prevista para o próximo día 15 ás 20.00 horas.
Nese encontro cos veciños, o Concello expoñerá o que tecnicamente considera necesario que debería revisarse por parte da Xunta “sen pechar a porta a achegas que os veciños poidan realizar nesa reunión e que tecnicamente tamén poidan ser viables”.
Andrés Hermida destacou que a importancia que este proxecto ten para Betanzos “despois de anos de reivindicacións” polo que considera que “é necesario acordar as actuacións para que ese proxecto sexa o mellor posible para os veciños e Concello e cubra as necesidades que en materia de seguridade levan esixindo durante anos”.
