Os servizos municipais revisaron as instalacións, que permanecen pechadas polo estado de alarma, para valorar os danos. Tamén revisarán o peche metálico que rodea o parque para substituír o tramo polo que accederon os xabarís ao recinto. É a primeira vez que os xabarís ocasionan danos nesta zona.
O Concello solicitoulle o ano pasado a Medio Ambiente actuacións concretas en varias zonas de Betanzos tendo en conta das importantes desfeitas e danos, reforzando a petición que tamén realizou a propia veciñanza afectada á Xunta xunto coa presentación dunha recollida de sinaturas.
María Barral trasladoulle no seu momento ao servizo de Patrimonio Natural os problemas que “están a sufrir os veciños e veciñas pola presenza de xabarís e os danos que ocasionan nas súas plantacións agrícolas”, solicitándolle que poidan atender as peticións que a propia veciñanza lles achegou a través da recollida de sinaturas para que a Consellería de Medio Ambiente poña en marcha medidas necesarias para o control da poboación de xabarís e poder establecer as axudas económicas compensatorias polos danos provocados ante a continua incursión destes animais nas parcelas de cultivo.
A zona afectada linda co espazo natural protexido da Rede Natura 2000, na desembocadura dos ríos Mendo e Mandeo, un lugar considerado zona de especial conservación pola súa fauna, “o que prohibe a caza e fai que os xabarís se refuxien nela”.
