Ante o inicio dos traballos de construción de dúas novas zonas verdes nas rúas Cabildos e Travesa, dentro do Programa de Mercados Sostibles financiado con fondos Next Generation, o Concello anunciou diversos cambios de tráfico no casco histórico durante o desenvolvemento das obras.
As restricións de tráfico poranse en marcha desde primeira hora da mañá do vindeiro luns, día 7 e afectarán:
– Rúa Travesa: esta rúa terá sentido de tráfico contrario ao actual.
– Rúa Cabildos: permanecerá cortada ao tráfico e ao paso peonil durante as obras. Só se permitirá pasar ao alumnado da escola infantil municipal e ás persoas acompañantes, e do Conservatorio municipal dende a rúa San Francisco.
– Rúa da Cerca e adxacentes: Accederán a esta zona pola rúa Prateiros. Os días de feira mensual, deberán facelo a través da Ponte Vella.
– O acceso ao centro histórico realizarase por Porta da Vila. Desde este punto, os vehículos circularán por rúa Nova, Torre, Pescadería, rúa Ferreiros para saír polo arco da Ponte Nova.
– Só poderán saír pola Porta da Vila os vehículos de reparto que, polas súas características, non poidan circular cara á Ponte Nova. Nese caso, poderán utilizar a Porta da Vila ata as 11.30 horas.
– Os vehículos particulares que trasladen e recollan ao alumnado da escola infantil municipal disporán dunha zona reservada para estacionar (cun tempo máximo de 5 min.) na praza Fernán Pérez de Andrade.
O Concello lamenta os inconvenientes que estas obras poden causarlle ás persoas residentes do casco histórico e á veciñanza en xeral; comercios ou profesionais de reparto, aínda que se trata dun proxecto e unhas actuacións que suporán unha mellora importante para a zona.
