O Departamento de Deportes do Concello de Betanzos pon en marcha unha nova edición do seu programa de roteiros de sendeirismo, que este ano terá como protagonista o Camiño Miñoto Ribeiro, tamén coñecido como o Camiño das Geiras ou dos Arrieiros.
A actividade desenvolverase ao longo de sete etapas que suman aproximadamente 125 quilómetros, desde Cortegada (Ourense), preto da fronteira con Portugal, ata Santiago de Compostela. O percorrido permitirá ás persoas participantes descubrir enclaves de grande valor natural e patrimonial como Ribadavia, Leiro, Pazos de Arenteiro, Feás, Soutelo de Montes, Forcarei ou Lestedo, onde o itinerario enlaza co Camiño da Vía da Prata.
As etapas celebraranse en domingo entre o 19 de abril e o 14 de xuño, co seguinte calendario:
- 19 de abril: Cortegada – Ribadavia (17 km)
- 26 de abril: Ribadavia – Leiro (15 km)
- 10 de maio: Leiro – Feás (16 km)
- 17 de maio: Feás – Soutelo de Montes (19 km)
- 24 de maio: Soutelo de Montes – Seoane (Meavía) (19 km)
- 7 de xuño: Seoane (Meavía) – Lestedo (+ Pico Sacro) (23 km)
- 14 de xuño: Lestedo – Santiago de Compostela (15 km)
As inscricións abriranse o xoves 9 de abril a partir das 10:00 horas a través da web municipal. O prezo é de 10 euros por etapa (70 euros en total), que se aboarán en dous prazos: 50 euros en abril e 20 euros a finais de maio.
Ofrécense un total de 100 prazas, que se adxudicarán por orde de inscrición, con preferencia para as persoas empadroadas en Betanzos. As persoas menores de idade deberán ir acompañadas por unha persoa adulta responsable.
A saída dos autobuses será ás 08:00 horas desde a parada do Cantón Claudino Pita, con regreso ao mesmo punto ao rematar cada etapa.
O Concello de Betanzos contará co apoio loxístico de Protección Civil e servizo de avituallamento, co obxectivo de garantir o correcto desenvolvemento da actividade.
Para máis información, as persoas interesadas poden contactar co Departamento de Deportes ou coa Oficina de Turismo.
